Delles veces

“Dicir que, delles veces”

I
Dicir que, delles veces,
l’orbayu bien de lloñe,
moyando les Asturies,
y, entoncia, los maizales de los campos
contemplen un paisaxe diferente,
cuayao pola humedá de la seronda,
quiciabes desi branu
qu’enllena colos brillos
semeyes y semeyes d’un agostu,
tamién ye defender esta tierrina.
II
Falar daquellos horros
que sienten nos sos sueños
la voz de señaldaes
d’un tiempu que se pierde nos entamos,
de tardes que marcharon por caminos
que nunca alcontró naide, cuando foron,
perdiéndose, olvidándose,
dexándose escaecer
nos montes de los pueblos y la aldea,
tamién ye recordar lo que ye nueso.
III
Y, al ver la flor del agua,
cerquina de la fonte,
detrás del castru vieyu,
cunta-y a la borrina que la nueche
llegó, con güeyos negros, per caleyes,
guetando recoyese nos llugares,
tamién ye facer dalgo
de bruxes y de bruxos,
si ye que somos bruxos los poetas,
cuntando los secretos destos valles.
IV
Y dícesme que’l Duje
caltién nes sos corrientes
los brillos del reflexu
del alba, cuando el alba bien con gana,
y sabes que’l color que tien el cielo
amuesa eses mañanes cristalines
que entamen en setiembre,
que quieren dar aniciu
a tiempos d’aquelarres y de ritos
que foron el secretu d’otros sieglos.
V
Ye’l casu que camiento
que ye lo más prudente
quedar en un paséu,
siguir pola vereda, dir saltando
les piedres neses playes de verdines
que guarden, ente bígaros y llámpares,
tamién les ilusiones
d’espumes que supieron
del llantu de la xente, na derrota,
dempués de que perdieron los astures.
VI
La sangre desa xente
pudiera ser la nuesa,
facenos comprendelo:
nel aire ta l’espíritu perdíu
de tolos asturianos que cayeron
puxando escontra’l pasu del romano,
cortando al islamita
la entrada nuna tierra
que quier la llibertá que-yos quitaron
esbirros criminales d’otros pagos.